काठमाडौं।गैरआवासीय नेपाली संघ (एनआरएनए)को १०औँ महाधिवेशन तथा निर्वाचनको मिति तीन दिन पछि सरेको छ।
संघले मंगलबार सूचना जारी गर्दै मार्च २४ र २५ मा महाधिवेशन गर्ने जानकारी गराएको हो।यो सहित संघको महाधिवेशन मिति सरेको पांचौं पटक हो । यसअघि मार्च २१ र २२ गते निर्वाचनको मिति तय गरिएको थियो । निर्बाचनको मिति पछि धकेल्ने संघको संस्थापन पक्षले जारी गरेको सूचनाको अध्यक्षका प्रत्याशी कुल आचार्य र संघका वर्तमान उपाध्यक्ष सोनाम लामाले भने तीब्र विरोध जनाएका छन् ।
संघका सल्लाहकारसमेत रहेका आचार्यले एकलौटी तरिकाले तोकिएको निर्वाचनको मिति मान्य नहुने बताएका छन् । मंगलबार फेसबुकमा स्ट्याटस लेख्दै उनले भनेका छन्, ‘यो संस्था सबैको हो । हामी सबै एउटै परिवार भएर बसेकोमा सानो समूहले आफ्नो स्वार्थका लागि यसलाई प्रयोग गर्दै आएको खुलासा भइसकेको छ । सहनुको पनि एउटा सीमा हुन्छ । अब संस्था बचाउन एउटा ठोस निर्णय गर्नुपर्ने वेला आएको छ । म सबै साथीलाई एकढिक्का हुन र संस्थाको हितका लागि जस्तोसुकै कडा निर्णय गर्न पनि तयार रहन अपिल गर्छु ।’ त्यस्तै, संघका उपाध्यक्ष सोनाम लामाले एकपक्षीय रूपमा गराइने चुनाव मान्य नहुने बताएका छन् ।
लामाले पनि मंगलबार फेसबुकमार्फत प्रतिनिधि विवाद समाधान नगरी गराइने चुनाव मान्य नहुने बताएका छन् । यसैबीच,गैरआवासीय नेपाली संघ (एनआरएनए)को अध्यक्षका लागि डा. बद्री केसी र रबिना थापाले उम्मेदवारी दर्ता गराएका छन् । संघको १०औं महाधिवेशनका लागि सोमबारदेखि खुला गरेको उम्मेदवारी दर्ता मंगलबार पाँच बजेसम्म समय तोकिएको थियो । तर, संघभित्रको विवादका कारण उम्मेदवारीका लागि तीन दिन थपिएको समितिले जनाएको छ । शुक्रबारसम्म उम्मेदवारी दिन सकिनेछ । संघको उपाध्यक्षमा धर्मराज अधिकारी र महासचिवका लागि अमेरिकाबाट गौरीराज जोशी तथा युकेबाट विनय अधिकारीले उम्मेदवारी दर्ता गराएका छन् ।
