आईतबार राती १२ बजेबाट लागु हुने गरि सोलुखुम्बुमा पनि १५ दिनसम्म लकडाउन गरिने भएको छ । शुक्रबार जिल्ला प्रशासन कार्यालय सोलुखुम्बुको सभाहलमा बसेको जिल्ला बिपत ब्यबस्थापन समितिको बैठकले यस्तो निर्णय गरेको हो । पछिल्लो समय सोलुखुम्बुमा पनि कोभिड-१९ संक्रमित दिनप्रतिदिन बढिरहेको भन्दै संक्रमण नियन्त्रणका लागि लकडाउन गर्ने निर्णय गरिएको हो ।
लकडाउनको अवधीमा मानिसहरूको आवत-जावतलाई पुर्ण नियन्त्रण गरिने भएको छ । खासगरी बाहिरी जिल्लाबाट सोलुखुम्बु प्रबेशमा कठोरताका साथ रोक लगाईने बिपत ब्यबस्थापन समितिले बताएको छ । यसलाई थप फैलनबाट रोक्नका लागि लकडाउन नै उपयुक्त बिकल्प भएको समितिको निष्कर्ष छ ।
प्रमुख जिल्ला अधिकारी गणेश बिक्रम शाहिको अध्यक्षतामा बसेको बिपतको बैठकले सहायक प्रमुख जिल्ला अधिकारीको संयोजकत्वमा जिल्लाका ८ वटै स्थानिय तहका स्वास्थ्य संयोजक, जिल्ला अस्पताल फाप्लुका प्रतिनिधि, रेडक्रस र पत्रकार महासंघ समेतको प्रतिनितित्वमा कोभिड नियन्त्रण परिचालन समिति समेत गठन गरेको छ । त्यसका अलावा अक्सिजन सिलिन्डिरको यथाशक्य ब्यबस्थापन गर्ने, संक्रमितलाई स्वासप्रस्वासमा समस्या आएमा जिल्लामै अक्सिजन दिन सकिने प्रबन्ध मिलाउने, रेफर गर्नुपर्दा एम्बुलेन्स तैनाथ राख्ने यदि जिल्लामा भएका एम्बुलेन्सले सेवा दिन अपुग भएमा सरकारी सवारी पनि संक्रमितलाई उपारार्थ अन्यन्त्र लैजान प्रयोग गरिने र खुम्बुमा अड्किएका पर्यटक तथा पर्यटन कर्मचारीलाई सम्बन्धित ठेगानामा फर्काउन प्रशासनले आवस्यक समन्वय गर्ने जस्ता निर्णयहरू शुक्रबारको बैठकले गरेको हो ।
जिल्लावासीलाई २ दिनको समय दिएर आवस्यक प्रबन्ध गर्न जिल्ला प्रशासन कार्यालयले आग्रह गरेको छ । शुक्रबारको बैठकले बैंकिङ काम गर्नुपर्ने भए आईतबार नै गरिसक्न पनि अनुरोध गरेको छ । अन्यथा आईतबार राती १२ बजेपछी १५ दिनका लागि लागु हुने गरी लकडाउन जारी गरिएको छ । यो लकडाउनलाई अवस्था हेरेर आवस्यकताका आधारमा थपघट गर्न सकिने जनाईएको छ ।
